काठमाडौँ । आन्दोलन चर्किएर बङ्गलादेशकी प्रधानमन्त्री शेख हसिनाले देश छाडेपछि नेपालमा उच्च सुरक्षा सतर्कता अपनाइएको छ ।
सीमा नाकामा कडाइ गर्नेबारे सशस्त्र प्रहरीका महानिरीक्षक राजु अर्यालले सीमा नाकामा कार्यरत सुरक्षा कमान्डरहरूलाई ब्रिफिङ गरेका छन् ।
सीमा क्षेत्रका कार्यरत कमान्डरहरूलाई अर्यालले ब्रिफिङ गरेको सशस्त्रका प्रवक्ता (डीआईजी) कुमार न्यौपानेले बताए ।
बंगालादेशबाट आउनेहरू नेपाल प्रवेश गर्न सक्ने आकलन गरिएको सीमा क्षेत्रका बाहिनीपति र गणपतिहरुलाई अर्यालले भिडिओ कन्फरेन्स मार्फत ब्रिफिङ गरेका हुन् ।
झापा, मोरङ, सुनसरीका गणपतिहरू, कोशी र मधेस प्रदेशका डीआईजी तथा अन्य कमान्डरहरू भर्चुअल ब्रिफिङमा सहभागी थिए । शेख हसिनाले देश छाडेको घटनाबारे सोमबार केन्द्रीय सुरक्षा समितिमा छलफल भएको थियो ।
गृहमन्त्री रमेश लेखक र सुरक्षा प्रमुखहरूले बङ्गलादेशको आन्दोलनको असर नेपालमा पनि पर्न सक्ने आकलन गर्दै सीमा नाकामा कडाइ गर्ने र सुरक्षा सतर्कता बढाउनेबारे छलफल गरेका हुन् ।
